ജയറാമിനെ നായകനാക്കി സത്യൻ അന്തിക്കാട് സംവിധാനം ചെയ്തു ഇന്ന് കേരളത്തിലെ തിയേറ്ററുകളിൽ എത്തിയ ചിത്രമാണ് മകൾ. ജയറാം-സത്യൻ അന്തിക്കാട് ജോഡി നീണ്ട പാതിനൊന്ന് വർഷങ്ങൾക്ക് ശേഷം ഒന്നിക്കുന്നു എന്ന പ്രത്യേകതയും മകൾക്ക് ഉണ്ട്. 2010 ൽ പുറത്തിറങ്ങിയ കഥ തുടരുന്നു എന്ന ചിത്രത്തിലാണ് ഇരുവരും അവസാനം ഒന്നിച്ചത്. അതുപോലെ തന്നെ മീര ജാസ്മിന്റെ ഏറെ നാളത്തെ ഇടവേളക്ക് ശേഷം ഉള്ള തിരിച്ചുവരവ് കൂടിയാണ് ഈ ചിത്രം. ഡോക്ടർ ഇക്ബാൽ കുറ്റിപ്പുറം ആണ് ചിത്രത്തിന്റെ രചന നിർവഹിച്ചിരിക്കുന്നത്.
രണ്ട് മതങ്ങളിൽ പെട്ട നന്ദകുമാറും ജൂലിയറ്റും വീട്ടുകാരുടെ എതിർപ്പിനെ മറികടന്ന് വിവാഹിതരാകുന്നു. അവർക്ക് ഒരു മകൾ ജനിക്കുന്നു. അപ്പു എന്ന് വിളിക്കുന്ന അപർണ. അതിന് ശേഷം ജീവിതത്തിലെ ബുദ്ധിമുട്ടുകൾ കാരണം നന്ദൻ വിദേശത്തേക്ക് പോകുന്നു. പിന്നീട് കുറെ വർഷങ്ങൾക്ക് ശേഷം നന്ദൻ നാട്ടിലെത്തുന്നതും അതിന് ശേഷം മകളുമായിട്ട് ഉണ്ടാകുന്ന പ്രശ്നങ്ങളും തർക്കങ്ങളും ആണ് ചിത്രം പറയുന്നത്. അവതരണ ശൈലിയിൽ പഴയ സത്യൻ അന്തിക്കാട് സിനിമകൾ പോലെ തന്നെ ആണെങ്കിലും ബോറടിക്കാതെ കണ്ടിരിക്കാവുന്ന ചിത്രമാണ് മകൾ.
ഞാൻ പ്രകാശൻ എന്ന ചിത്രത്തിലൂടെ ശ്രദ്ധേയയായ ദേവിക സഞ്ജയ്‌ ആണ് അപർണ ആയെത്തിയിരിക്കുന്നത്. ഇവരെ കൂടാതെ സിദ്ധിക്ക്, ഇന്നസെന്റ്, നസ്‌ലിൻ, അൽത്താഫ്, ശ്രീലത തുടങ്ങിയ വമ്പൻ താരനിരയും ചിത്രത്തിൽ ഉണ്ട്. ചിത്രത്തിലെ അഭിനേതാക്കൾ എല്ലാവരും തങ്ങളുടെ ഭാഗം വളരെ മനോഹരമായി സ്‌ക്രീനിൽ എത്തിച്ചിട്ടുണ്ട്. കുടുംബപ്രേക്ഷകർക്ക് ധൈര്യമായി തിയേറ്ററിൽ പോയി കാണാവുന്ന ചിത്രമാണ് മകൾ. നിറഞ്ഞ മനസ്സോടെ ചിത്രം കണ്ട് തിയേറ്ററുകളിൽ നിന്ന് പ്രേക്ഷകർക്ക് പുറത്തിറങ്ങാൻ ആവും എന്ന് ഉറപ്പ്.
